SOTE TUPIGE KELELE

 "ZIMWI HILI HALIJAFA"

Ama kweli rushwa zimwi, tena zimwi kwelikweli

Lazidi hata ukimwi, upungufu kinga za mwili

Kama moto halizimwi, kila kona watu chali

Zimwi linatutafuna, sote tupige kelele

Halichomwi Kwa mkuki , kwa risasi halitoki

Chunguni halipikiki, ni gumu halikatiki

Adui wa kila haki, kuchafua halichoki

Zimwi linatutafuna, sote tupige kelele

Tena halijabagua, kwa yeyote linapita

Rangi yake yavutia, kila mtu kumvuta

Mjini kijiji pia, kotekote talipata

Zimwi linatutafuna, sote tupige kelele

Wengi walio kitini, wamekwisha kuvamiwa

Ni wema sana machoni, moyoni ni kama chawa

Aingiapo mwilini, hataki kuondolewa

Zimwi linatutafuna, sote tupige kelele

Nyangumi pia dagaa, wote limewafikia

Mashilingi wayazoa, nyumba zao kujengea

Hoja wanazozitoa, uongo tamu kolea

Zimwi linatutafuna, sote tupige kelele

Wako kama hayawani, hawataki makatazo

Kila kitu mfukoni, wanazidisha ujazo

Utu kwao ndio nini, Rushwa kwao ndiyo chanzo

Zimwi linatutafuna, sote tupige kelele

Wangine kiomboleza, wao kwao ni tulizo

Hukumu kuigeuza, hilo kwao si tatizo

Haki nazo kuziuza, kila kona ni uozo

Zimwi linatutafuna, sote tupige kelele

Yatima hata wajane, wamekuwa kama ngazi

Wanapopanda  wengine, kukanyagwa ndiyo kazi

Wakisema wayanene, mwisho wake ni machozi

Zimwi linatutafuna, sote tupige kelele

Huko nako barabara, nao wamo mtegoni

Wamebaki na mkwara, nacho kidogo pembeni

Japo wana mshahara, wataka na mkononi

Zimwi linatutafuna, sote tupige kelele

Kanisani ‘sikitini, zimwi linajipenyeza

Tuulize kulikoni, nako tume kuchunguza

Hawa watu wa Imani, Mola hajawatuliza?

Zimwi linatutafuna, sote tupige kelele

Masikini hatiani, matatani kibindoni

Makosani hukumuni, mtieni gerezani

Nguvuni afanye nini, mhaini wa kitini?

Zimwi linatutafuna, sote tupige kelele

Hili zimwi tangu kale, halina wa kulitaka

Sio hawa wala wale, kauli ni toka toka

Kwa hatua na kelele, zimwi hili tatimka

Zimwi linatutafuna, sote tupige kelele

Zimwi hili ni laana, lachafua nchi yote

Tena halina maana, adui wa watu wote

Linaleta kuumana, na vilio kotekote

Zimwi linatutafuna, sote tupige kelele

Hongera kwa wateule, wapigao makelele

Maisha yasiwe yale, ya hadithi tangu kale

Uzalendo utawale, tamaa tutupe kule

Zimwi linatutafuna, sote tupige kelele

Tusitazame usoni, tukitaka ua nyani

Wahuni na waumini, vitini uraiani

Bungeni nako chamani, mkoani wilayani

Zimwi linatutafuna, sote tupige kelele

Majumbani mashuleni, televisheni redioni

Barabani mtaani, mjini na vijijini

Jijini mtandaoni, Gazetini  vitabuni

Zimwi linatutafuna, sote tupige kelele

Mahakamani barazani, Jeshini sipitalini

Ofisini mashambani, makampuni sokoni

Mashuleni na vyuoni, kusini kaskazini

Zimwi linatutafuna, sote tupige kelele

Hata nako vitabuni, zimwi hili ni chukizo

Chukizo kwa Maanani, kwalo hataki mchezo

Hasa wale wa enzini, wasiotaka katazo

Zimwi linatutafuna, sote tupige kelele

Chonde chonde wanakwetu, tusimmunye maneno

Sote tubebe mtutu, tuanzishe fungamano

Nchi yetu haki zetu, tusongeshe mpambano

Zimwi linatutafuna, sote tupige kelele